அழியா அனல் காடு – ‘சே’

 

“சே”

மரணித்த ஒருவனின்

மரணிக்காத ஓர் வடிவம்….

மனிதருள் மடிந்திட்ட

உரிமைக் கனலை, வல்லுணர்வை

மீளச்செய்த

ஓர் ஒற்றை எழுத்து !

புரட்சி எனும் மொழியை

பாரில் பலரை

பேச வைத்த எழுத்து

ஏட்டளவிலும் அகற்றிடு

ஏகாதிபத்தியத்தை

என்று

எல்லோரையும் முழங்க வைத்த எழுத்து !

அடிமைத்தனம்

எங்கு சூழ்ந்திடினும்

எதிர்த்து நின்றிடுவென

எளியோனையும் கூற வைத்திட்ட

கடலலைச் சீற்றம் !

எதேச்சதிகாரத்தின்

ஆணி வேரை உலுக்கி

பிடுங்கிய

உக்கிர எழுத்து

உலகம் முழுமைக்குமான விடுதலை

என்று உறுமி

அடிமை உள்ளங்களில் யாவும்

ஊக்கம் தந்திட்ட ஊன்று கோல்,

துணிவின் சுருக்கம் !

புரட்சி எனும் கொடி

ஏந்திய

யாவருக்கும் முகவரி

இந்த ஒற்றை எழுத்து !

அடக்குமுறையின்

அடிச்சுவடையே

அடங்க வைத்த அபாய ஒலி !

கொடுங்கோலனின்

கோட்டைக்குள் நுழைந்து

சொடுக்கிட்டு எச்சரித்த

தீப்பிழம்பு !

தோட்டாக்களை தோலுயர்த்தி

எதிர்த்து நின்ற

வீரத்தின் அகராதி !

வலைக்குள் சிக்குண்ட போதும்

அலட்டு சிரிப்பை உதிர்த்திட்ட

அஞ்சாமை !

பீரங்கிப் படையை

தெரித்தோடச் செய்த

தீரம் நிறைந்த செந்நிற

கூர் பார்வை கொண்ட

எரிகழல் மாந்தனின் முதன்மை

எழுத்து !

ஆர்ப்பரிக்கும் அகோரச் சின்னம் “சே”

என்றும்

அழியாத அனல் காடு !

 

தோழமையுடன்

பழனி ஷஹான்

.